Transcription
1Monseigneur, j’ay receu votre lettre du iiiie de ce mois, et veu par icelle les surprinses d’Alez,
2de Ruynac, Hoste et Le Puy St Martin, et le chastiment qu’a receu la Forest de sa desobeissance
3à son prince souverain. On adiouste depuis larrivée de monsieur de Caylus et du sieur du
4Teil que les lieux d’Estoile, La Bache, Monteillez et Montelleger ont esté surprins, à quoy
5je ne veulx adiouxter foy, combien que nous sommes en une saison où dheure à autre
6adviennent cas inopinez. Ce aujourdhuy, monseigneur le marechal a receu une lettre du sieur de
7Lartusie, lequel il avoit envoyé vers monsieur le victonte Paulin pour amener les
8sieurs de Lhospital et Dyolet à la conference. Il disoit qu’on le devoit depescher dans iiij
9jours après, et estoient ses lettres du ve de ce mois. Il adviendra ce que Dieu en a ordonné.
10Mais tant de remises me sont fort suspectes, et m’empeschent de croire que lesdits sieurs
11Viconte, de Lhospital et Dyolet ayent envie dentendre à ladite conference. Jespère que
12nous en scaurons le court ou le long dans iiij ou v jours, dont je vous tiendray
13adverty, et de toutes choses que jestimeray dignes de vous. Joubliois à vous dire que
14ung courrier envoyé de la part de messieurs de la court de parlement de Thoulouze
15à mondit seigneur le marechal et lequel partit de Thoulouze le VIe de ce mois, a rapporté
16que monsieur de la Noue estoit en campaigne et avoit prins Xainctes, Pons,
17Taillebourg, Taillemont ; et ceulx de la religion tant du costé du Guyenne que du Gascoigne
18pour se secourir lun lautre, avoient dressé ung pont sur la Garonne pour la deffence
19duquel estoient deux fortz aux deux boutz, lun nommé le Mas de Verdun, lautre
20Fignant. On a aussy prins en Lymousin et Perigueulx, Sarlac et Brive la Gaillarde
21qui sont deux belles villes. Tout cella me rend plus doubteuses leurs volontez à la conference
22et à recevoir la paix, à laquelle je prie Dieu inspirer les cœurs dun chacun, et vous donner ;
23monseigneur, en parfaicte santé heureuse et longue vie. De Montpellier, ce jeudy
24XIe jour de mars 1574
25Vostre à jamais plus fidelle et plus
26affectionné serviteur Truchon
27Ledit sieur Dartusie escrit que
28la ville d’Alby a cuidé estre
29prinse et que les ennemis estoient
30aux faulxbourgs quant
31lentreprinse fut descouverte.